CEBU, Philippines - Naugdaw ang duha ka panimalay ug usa ka sakyanan sa nahitabong sunog sa sitio Pangpang, barangay Tapilon, lungsod sa Daanbantayan alas 12:10 ang takna miaging tungang gabii. Ang nasunog nga panimalay nga pulos ginama sa light materials gipanag-iya nila ni Leo Caballa, 54 ug Danilo Montana , nagpuyo sa maong dapit.
Si SPO1 Romeo Basubas sa kapolisan sa maong lungsod nga naghimo og pakisusi miingon nga lakip sa nasunog mao ang Nissan Sentra nga sakyanan nga gipanag-iya ni Montana.
Matud pa ni Basubas nga si Montana wala diha sa pagkahitabo kay namista kini sa kasikbit nga barangay Agujo.
Diha na lang nasayran ni Montana nga wala na siya’y kaulian sa iyang pagpauli kay naugdaw na ang iyang panimalay ug lakip na sa iyang sakyanan nga gi-parking niini.
Samtang ang panimalay ni Caballa nga naugdaw gibanabana nga mokantidad og P50,000 ang danyos samtang wala pa nila matino ang danyos sa panimalay ni Montana. Wala pa matino kung unsay hinungdan sa maong sunog sanglit wala pa mahuman ang imbestigasyon sa kabomberohan.(/EIM)(BANAT NEWS)