CEBU, Philippines - Ang kadagkoan sa General Service Office (GSO) sa Cebu City Hall maoy gibasol ngano nga wala masweldohi ang 20 ka “job order†nga mga kawani nga gidestino sa Pasil Fish Port sukad kaniadtong Abril sa miaging tuig hangtod karon.
Ang gitudlo nga supervisor sa mga job order workers nga si Graciano Lauron miingon nga nataligam-an sa kadagkoan sa GSO ang gisumiter niya nga dokumento aron unta masukip sa Supplemental Budget ang sweldo sa iyang mga sakop.
Matud ni Lauron nga nasayran niya nga ang kantidad nga gikinahanglan aron masweldohan ang 20 ka job order workers nga gipabantay sa Pasil Fish Port wala matagad sa GSO.
Nasayran hinoon nga ang nahisgutang JO’s gi-hire sa dakbayan sa Sugbo bisan og walay gitagana nga salapi para sa ilang sweldo mao nga masweldohan lang sila kun adunay subra nga kwarta gikan sa GSO.
Ang trabaho sa mao nga mga JO’s nga gikontrata og ‘tag P320 ang adlaw mao ang pagbantay sa Pasil Fish Port aron walay makamugna og kahugaw, ingon man ang pagbantay sa Community Scouts building.
Si Engr. Rolly Ardoza nga kanhi hepe sa GSO miingon nga wala siya masayud sa gipanulti ni Lauron. Miingon si Ardoza nga kaniadto gitabangan niya ang mao nga mga JO’s kay duna man sila’y surplus sa GSO.
Matud ni Lauron nga pahunongon na niya pag-report sa ilang trabaho ang napulo ka JO’s nga nadistino sa Pasil Fish Port apan iya usa nga gipapadayon kadtong nadestino sa Community Scouts.
Ang Community Scouts building maoy gibutangan sa mga bata nga libudsuroy mao nga kinahanglan gyud kini nga adunay bantay kanunay. (BANAT NEWS)