CEBU, Philippines - Ang job order kinsa giingong nanion og pusil niadtong milabay’ng semana posibleng masuspenso o mataktak sa trabaho kung mapamatud-ang sad-an sumala pa ni Konsehal Antonio Bacaltos sa siyudad sa Talisay.
Kini kabahin sa giingong nahitabong kagubot diha sa buhatan sa Fishermen Sea and Ecological Care (FISECA) sa barangay Cansojong dihang usa ka Ritchie Roritos nga usa ka JO sa FISECA ubos sa liderato ni Arturo Aras ang gireklamong nanion og pusil nila ni Herminigildo Villegas ug Joel Vega nga parehong JO usab diha sa FISECA apan ubos sa liderato ni Gregorio Dela Torre.
Si Konsehal Antonio “Jojo†Bacaltos, chairman sa committee on environment nga nahinabi sa mga tigbalita nagkanayon nga napadangat na niya ngadto kang Mayor Johnny Delos Reyes ang maong problema.
Ang maong kamanduan giluwatan human nga si Dela Torre ang gibalik isip hepe sa FISECA human nga ang grupo sa mga mananagat mireklamo batok kang Aras.
Matud ni Bacaltos nga magpahigayon usab siya og imbestigasyon sa hitabo ug makigtigom siya sa committee ug kung mapamatud-an nga si Roritos sad-an kini posibleng masuspenso o mataktak kini sa trabaho. (BANAT NEWS)