CEBU, Philippines - Duha ang patay ug duha ang naangol sa aksidente sa kadalanan sa managlahing lugar sa lalawigan sa Sugbu.
Diha sa barangay Panadtaran sa lungsod sa San Fernando, patay ang usa ka Carlos Zabala, 37, taga Camagong, Lahug sa dakbayan sa Sugbo samtang angol ang angkas niini nga si Elsa Andiano, 32, taga Sangat, San Fernando.
Samtang ang drayber sa laing motor mao si Ruel Hanava, 32, taga Bulangang, San Fernando.
Base sa imbestigasyon ni PO3 Reynaldo Tañica Jr., PO2 Cleofas Cabrera, PO2 Edgar Enclonar nga ang motor nga gikan sa barangay Balud, si Hanava kusog kini nga nagpadagan sa iyang motor.
Matud pa nga nag ikis-ikis ang dagan sa motor ni Hanava hangtod nga nagbangga ang duha ka motor diha sa dalan.
Nangatumba ang motor nga miresulta sa pagkaangol ni Andiano apan nakaangkon og grabeng kadaot sa lawas si Zabala samtang naangol usab si Hanava ug ang tulo daling gidala ngadto sa Vicente Sotto Memorial Medical Center.
Apan gideklarar nga dead on arrival si Zabala sa attending physician sa maong tambalanan.
Patay usab ang usa ka Gil Breiane Malazarte Billones human nasampak sa gikasugat nga 10- wheeler truck sa barangay Sabang, dakbayan sa Danao alas 2 pasado ang takna sa miaging kaadlawon. Si PO1 Romil Costan, imbestigador sa traffic section sa kapolisan sa dakbayan sa Danao mibutyag nga natanggong karon ang drayber sa trak nga si Romulo Cataluna Paglinawan, 45, taga Bacolod City, nga nagkarga og dry goods padulong sa dakbayan sa Sugbo.
Sumala pa nga nag-ikis ekis ug kusog kaayo ang dagan ni Billones nianang tungora maong misuway og hunong si Paglinawan apan nalahos gyud ang biktima sa atubangan sa iyang trak.
Dali nga gihatod ang biktima sa Danao District Hospital apan paglabay sa pipila ka oras namatay kini. (/EIM)(BANAT NEWS)