CEBU, Philippines - Mag-atubang karon og dakong problema ang China niining bag-ohay nga gipalig-ong relasyon sa Japan ug sa tradisyonal nila nga kaaway nga mao ang India nga usa usab ka nuclear capable nga nasud.
Sila si Japanese Prime Minister Shinzo Abe ug ang Prime Minister sa India nga si Manmohan Singh nagtagbo sa New Delhi kagahapong adlawa alang sa annual summit.
"A strong India and a strong Japan coming together can do wonders," matud pang Abe sa maong meeting. Usa sa angay hatagan ug gibug-aton sa maong panagtigom mao ang pagpalig-on karon sa bilateral defense cooperation sa duha ka nasud. Maglakip na niini ang regular nang joint maritime exercises nga himuon sa makadaghang higayon. Laing senyales nga mas hugon ang relasyon sa duha ka nasud mao ang pag-imbitar kang Abe sa umaabot nga Indian Republic Day parade diin iparada sa India ang ilang mga armas lakip na ang ilang mga nuclear weapons. Ang India ug China nagkagiyera na sa utlanan sa Himalayas niadtong 1962, nakig-alyansa ang India sa ubang mga silingang nasud nga silingan usab sa China aron kapugngan ang ambisyon sa China.
Ang pag-imbitar og lider sa usa ka nasud sa New Delhi sa ilang mga Republic Day parades usa sa mga senyales nga gusto sa India ang mas lig-ong relasyon niini sa maong nasud.
Gipautang usab ni Abe og $2-billion low-interest loan ang India alang sa Delhi Metro ug misaad nga hingusgan pa sa Japan ang economic cooperation sa uban pang infrastructure projects.
"We noted with satisfaction the growing frequency of our political engagement and our expanding defense and security cooperation. Our bilateral maritime exercises have now been established on an annual basis," matud pang Singh.
Lakip sa gitugot sa Japan mao ang pagbaligya niini sa ilang amphibious search and rescue ShinMaywa US-2 planes alang sa Indian Armed Forces. Apan dili kini armado subay sa gipatuman sa Japan nga pagdili nila og baligya og armas sa ubang nasud. (AFP/EIM)