CEBU, Philippines - Kritikal ang kahimtang sa usa ka hubog nga gwardiya nga giingong milayat sa Maritima Building, barangay Sto. Niño sa South Road Properties alas 9:00 sa miaging gabii aron unta moikyas sa polis nga migukod kaniya human kini naalarma nga nagdala kini og armas.
Ang kritikal naila nga si Ben Selgas sa Golden Sun Security Agency nga kasamtangang nadestino sa Cebu Port Authority.Base sa imbestigasyon sa kapolisan nga si Selgas nakig-inom sa iyang kauban nga guwardya nga si Roque Abella Jr. nga nag-duty niadtong higayona.Matud pa nga ang hubog nga si Selgas naglakaw-lakaw dala ang usa ka shotgun.Gialarma si Selgas busa daling mitubag sa maong alarma ang car 003 ug ang 007 sa Mobile Patrol Group sa maong lugar.
Dihang miabot ang duha ka patrolcars daling midagan si Selgas ug misulod sa Maritima Building apan gigukod kini nila ni PO2 Domigo Cabuenas, PO2 Eric Saavedra ug sa mga sakop sa Special Weapons and Tactics pinangulohan ni PO2 Bradford Labandero.
Matud pa nga dihang na-corner na sa kapolisan si Selgas milayat kini sa tulo ka andana nga building.Nakaangkon si Selgas og grabing kadaot sa iyang ulo ug sa iyang lawas ug dali kining gidala sa kapolisan sa Vicente Sotto Memorial Medical Center aron matambalan.Narekober gikan sa kainom ni Selgas nga si Abella ang duha ka 12-gauge nga shotgun nga isyu niini gikan sa agency.Ang maong armas gi-turnover sa miresponding polis ngadto ni SPO3 Samuel Negro sa Waterfront Police Station. (BANAT NEWS)