CEBU, Philippines - Ang mga opisyal sa barangay Tabunok naproblema sa usa ka babayeng amang nga walay paryente busa ilang gisagop ug gipasaka sa barangay hall.
Kagahapon sa udto si Maria Floriza Rabaya sa Gender and Development Person sa barangay Tabunok uban sa hepe sa tanod nga si Nestor Bacalso nangayo og tabang sa City Social Welfare ug sa kapolisan aron itunol ang maong amang ug makapangita kini sa iyang mga paryente .
Si Rabaya ug Bacalso mibutyag sa Banat News nga ang maong amang gihiling na sa midwife sa barangay tungod kay daku og tiyan ug nahibaw-an nga unom ka buwan kining nagsabak. Niadtong Enero 17, 2014 sa alas 10:30 sa gabii ang maong amang gitugyan sa duha ka mga babaye ngadto sa mga barangay tanod.
Matud ni Bacalso nga ang maong mga babaye kinsa maoy unang misagop sa amang nahadlok sa pagtuo nga may kakunsabo ang maong amang dihang nasakpan nila nga may ka- text sa cell phone niini.
Apan matud ni Bacalso nga paghiling nila sa cell phone sa amang ang kaugalingon lang niining numero ang nakarehistro sa phonebook ug walay mga sulod nga mensahe o ubang contact ang inbox niini.
Gisuwayan sa mga tanod og tawag ang numero sa iyang cell phone ug mibagting kini.
Ang maong amang usab giingong dili kahibalong mosuwat hinungdan nga wala mailhi ang iyang ngalan, ingon man address ug ginikanan.
Dugang ni Bacalos ug Rabaya nga ang maong amang mura’g milayas kay adunay dalang mga gamit sa balay sama sa balde ug maleta sa mga sinena. (/WC)(BANAT NEWS)