CEBU, Philippines - Napaig ang usa ka 42- anyos nga may kabilinggan sa panglawas nga babaye dihang naapil kini sa pagkasunog sa naugdaw nga panimalay nga gipanag-iya sa magulang niining lalaki nga nahimutang sa sitio Canlingo, barangay Sabang, dakbayan sa Danao alas -8 pasado ang takna sa miaging gabii.
Ang napaig mao si Anesitas Qui, dalaga nga nagpuyo sa panimalay nga gipanag-iya ni Deokleceno Qui nga igsoon niini nga nahimutang sa maong dapit nga ginama sa semi concrete materials.
Si FO2 Leopoldo Pesquera, imbestigador sa kabomberohan sa maong dakbayan nga nahinabi sa Banat News miingon nga sa ilang imbestigasyon nga gihimo ilang nasayran nga milakaw ang igsuon sa biktima nga si Deokleceno kay duna kini gipalit sa botika.
Dugang pa niya nga maoy nahibilin sa panimalay ang biktima nga nahimutang sa iyang wheelchair ug kauban si John Michael Qui, 17, nga pag-umangkon nilang lalaki nga nagpakaon pa niini og panihapon.
Matud pa ni Pesquera nga human sa pagpakaon, migawas ang pag-umangkon ug kay wala may kuryente, kandila lang maoy ilang gigamit nga gitungtong sa plastic nga lingkoranan.
Apan sa ilang pagbalik dako na kaayo ang kalayo sa panimalay. Ang sunog nakontrolar sud lang sa tulo ka minutos apan napaubos kini sa second alarm ug mokabat sa P70,000 ang danyos. (BANAT NEWS)