CEBU, Philippines - Nagbilin og kadaot sa lalawigan sa Sugbo ang bagyong Agaton nga nahimo na lang nga Low Pressure Area tungod sa wala’y hunong nga uwan.
Kini dihang mikapin sa 200 ka tawo sa bukirang bahin sa Balamban ang gipabakwit sa ilang mga balay sa miaging hapon human moliki ang usa ka bungtod duol sa kabalayan sa barangay Gaas.
Matud pa ni Chief Insp. Richard Oliver, ang hepe sa kapolisan sa Balamban nga ang mga residente tua karon sa barangay hall sa Gaas ug sa Gaas National High School.
“Daghan na og cracks ang yuta unya landslide prone pud ang lugar,†matud pa ni Oliver.
Dugang pa ni Oliver nga landslide prone area ang kabukiran sa lungsod sa Balamban ug ila pang gisusi kun angayan bang pabalhinon ang ubang mga molupyo tungod sa dautang panahon.
“Gaas lang ang giuna namo kay possible anytime pwede mo-collapse ang yuta,†sumala pa ni Oliver. Sa miaging semana giisa sa hepe sa Cebu Provincial Police Office, Sr. Supt Noel Gillamac ngadto sa full alert status ang lalawigan sa Sugbo tungod sa hulga sa bagyong Agaton.
Gimandoan usab ni Gillamac ang kapolisan sa lalawigan nga makig-alayon sa local nga kagamhanan ug sa pag-monitor sa mga posibli nga pagdahili sa yuta ug sa baha.
Sa miaging Biyernes sa gabii midahili usab ang yuta sa Transcentral Highway tungod mismo sa balay ni Balamban Mayor Alex Binghay ug wala kini maagii og mga sakyanan pipila ka oras.
Walay gikatahong naangol o nakalas sa maong hitabo ug dali ra nga nahawan ang yuta nga mitabon sa dalan kay gipahawanan dayon kini sa local nga kagamhanan. (/WC)(BANAT NEWS)