CEBU, Philippines - Ang hepe sa Department of Public Services (DPS) nga si Rolly Ardoza mosugyot ni Mayor Michael Rama nga hatagan og ganti ang mga kawani nga abtik nga nanglimpyo sa dakbayan human sa Sinulog Grand Parade. Matud ni Ardoza nga angayan lang g’yud nga pahalipayan ang mao nga mga kawani gikan sa DPS, Parks and Playground ug sa City Environment Sanitation and Enforcement Team (CESET) nga nagtabangay paglimpyo sa dakbayan sa Sugbo human sa parada. Ang pangulo sa garbage collection division sa DPS nga si Engr. Roger Legaspi miingon nga anaa ra ni Mayor Rama ang paghukom kun hatagan ba sila og ganti sa dali nga paglimpyo sa dakbayan.
Miingon si Legaspi nga dul-an sa 200 ka tonelada nga mga basura ang ilang natigom gikan sa lainlaing dapit sa dakbayan atul sa kalihukan sa Sinulog kaniadtong Domingo.
Kapin sa 500 ka kawani ang gigamit sa DPS aron magtinabangay sa paglimpyo sa palibot sa dakbayan.
Sa nanglabay’ng katuigan mata’g usa kanila gipanghatagan og ta’g usa ka sako nga bugas-humay. Si Mayor Rama wala mobalibad apan matud pa tan-awon niya kun aduna ba’y kwarta nga magamit sa paghatag og pahalipay sa mga kawani. (/EIM)(BANAT NEWS)