CEBU, Philippines - Usa ka Amerikanong turista nga gituohang hubog natanggong sulod sa selda human gihapak ang windshield sa usa ka sakyanan ug gisumbag pa niini ang driver nga usa ka tinun-an sa pagka-arkitekto.
Ang suspetsado nga si James Anthony Samul, 68, sa Las Vegas, Nevada, USA, gi-aresto atubangan sa usa ka mall sa Barangay Banilad, syudad sa Sugbo niadtong Martes sa hapon human mireklamo ang usa ka John Emmanuael Pardillo, nagmaneho sa Red Honda Fit nga sakyanan kansang windshield naguba.
Matud pa nga nagdagan ang sakyanan sa biktima dihang kalit milabang sa dalan ang suspek ug sa iyang paghunong, gihapak niini ang hood sa sakyanan. Kini maoy hinungdan nga minaog si Pardillo ug gisitar ang maong langyaw.
Apan dihadiha giingong gisukmag kini sa suspek sa iyang apapangig . Ang suspek kusganong mihimakak sa mga pasangil apan gitanggong gyud siya sa karsel sa kapolisan ug napasakaan og kasong malicious mischief ug physical injuries sa Tourist Police Unit. (BANAT NEWS)