CEBU, Philippines - Mura’g nagmaikogon ang mga sakop sa City Traffic Operations Management (CITOM) sa pagpanakop sa mga masalaypong drayber kaniadtong buwan sa Nobiyembre.
Ang report ni Sofia Bacolod, hepe sa Traffic Violations Bureau (TVB) sa CITOM, nagkanayon nga ubos og kapin sa usa ka milyon ka pesos ang koleksyon sa CITOM kaniadtong Nobiyembre kun itandi sa nasundan nga buwan.
Si CITOM Executive Officer Rafael Christopher Yap mireport sa City Hall nga miabot lang og P4,357,120 ang nakolekta sa CITOM sa buwan sa Nobiyembre nga mas ubos kay sa P5,460,939 nga koleksyon sa Oktubre.
Ang administrative penalty nga maoy multa sa mga madakpang draybers nga makahimo og kalapasan sa balaud sa tukmang pagmaneho og sakyanan mikunhod pag-ayo ngadto na lang sa P538,930 gikan sa P1.2 milyones sa miaging Oktubre.
Bisan ang multa sa kampanya sa smoke belching kon kadtong mga sakyanan nga magbuga og itum kaayo nga aso mikunhod ngadto na lang sa usa ka libo ka pesos gikan sa P3,000. Nasuta base sa report ni Bacolod nga halos ang tanang mga multa ug ubang revenues mikunhod g’yud pag-ayo sa buwan sa Nobiyembre.
Ang labing daku nga kantidad nga nakolekta sa CITOM gikan sa bayad sa mga tag-iya og sakyanan nga mo-parking daplin sa mga karsada kay mikolekta kini og P3.1 milyones apan ubos gihapon sa P3.3 milyones sa Oktubre.
Daghan ang nahibulong kun nganong mikunhod ang koleksyon sa parking nga puno-puno man ang mga parking areas daplin sa karsada kaniadtong buwan sa Oktubre. (BANAT NEWS)