CEBU, Philippines - Human mipanaw ang orihinal nga naghimo sa dance steps sa Sinulog o “sinug†nga si anhing Lola Estellita “Titang†Diola ipadayon gihapon sa nahabilin niya nga kabanay ang ilang panaad kang Señor Santo Niño matag Sinulog.
Si Carolina Diola, 63, pag-umangkon ni Lola Titang mao na karon ang gibinlan nga mopadayon sa ilang grupo nga gihinganlan nila og “Torang’s Group†uban niini ang iyang anak nga si Rommel Borja.
Asoy pa ni Carolina sa Banat News, malipayon gihapon sila nga ilang ipadayon ang ilang panaad ngadto kay Señor Santo Niño apan naa’y gamay’ng kasubo kay tungod dili na pareha sa una nga naa pa si Lola Titang uban kanila.
“Bata pa ko, mao nani akong namat-an gyud maong ako man ang gibinlan ni Inday Titang ipadayon gyud namo samtang himsog pa ko og lawas kay amo ra man gihapon ni ipasa sa akong mga apo puhon,†matud ni Carolina.
Karong umaabot nga Sinulog 2014, baynte kapin sa ilang kabanay ang mosayaw sa fluvial parade apil na niini ang mga bata.
Matud pa ni Rose Marie Abana, 30, apo ni Lola Titang, wala sila’y giusab sa mga steppings sa Sinulog, kung unsa ra gyud ang gitudlo ni Lola Titang mao ra gihapon kini karon.
“Wala may nausab sa steppings amo hinuon gitarong pag-ayo kay masuko man to si Inday Titang kun dili graceful mosayaw,†ingon ni Rose Marie. Inday Titang ilang naandang tawag kang Lola Titang sa ilang lugar. Sigun pa ni Carolina nga donated gikan sa Sandiego Dance Company ang ilang mga costumes nga ilang sul-obon kun mosayaw sila apan kaniadto ug hangtod karon giabagan gihapon sila sa Ramon Aboitiz Foundation nga nahimo na nilang suki.
Gigamit pa usab nila ang tambol ni Lola Titang nga pila na ka dekada wala pa gihapon maguba. Matag-gabii usab sila mag-practice sa ilang mga sayaw atubangan ra sa ilang panimalay.
Sigun pa sab sa anak ni Carolina nga si Rommel, kun naa sila’y mga imbitasyon andam silang modawat bisa’g unsa ang ihatag kanila, ma kwarta man o pagkaon. “Kinasing-kasing man ni among pagsayaw, para mani sa tanan ug para ni Señor Santo Niño,†asoy ni Rommel.
“Pila na ni ka dekada namong gibuhat ug amo gihapon ning ipadayon hangtod pila na ka henerasyon ang moabot alang lang kang Señor Santo Niño,†dugang ni Carolina. (/EIM)(BANAT NEWS)