CEBU, Philippines - Gipahugtan ang seguridad sa sulod sa Basilica Menore del Sto. Niño sumala pa sa hepe sa Waterfront Police Station Chief. Insp. Weldemar Tiu.
Matud ni Tiu nga may na-monitor sa CCTV nga dili lang mga bugoy ang mangunguot karong panahona kun dili lakip na ang mga babaye nga hitsuraan.
Miingon si Tiu nga kining maong mga babaye usa usab ka pundok nga may duha ngadto sa tulo ka miyembro nga na-monitor sa CCTV nga nanguot sulod mismo sa Basilica.
“Naay mga gwapa, manguot, group of two or three females, na-monitor namo through CCTV, hitsoraan ni sila,†matud ni Tiu.
Gani sumala pa ni Tiu nga sa misa sa rector sa Basilica nga si Fr. Jonas Mejares miawhag sa nanambong nga usa na lang ka kamot ang iisa ug ang usa ikupot sa mga gamit inig kanta sa Gozos sa Sto. Niño, aron di masikwati ang mga butang sa mangunguot.
Usa usab sa labing bantayanan matud pa ni Tiu mao ang panahon sa procession tungod kay modugok man gyud ang tawo.
Hangyo sa opisyal nga gikinahanglang security conscious gyud ang matag usa ug likayan ang pagdala og mahalon nga mga butang ug kun magdala gyud kinahanglan nga kuptan gyud kini og maayo.
Kini tungod sa kapilit og kamot sa mga mangunguot. (/WC)(BANAT NEWS)