CEBU, Philippines - Andam na ang kapolisan sa pagsugod sa kalihokan sa Sinulog, sumala pa ni Sr. Supt. Noli Romana, hepe sa Cebu City Police Office kagahapon. Matud ni Romana nga plantsado na nila ang ilang mga lakang sa seguridad sa Sinulog. Dugang pa ni Romana nga andam na sila ilabi na sa Walk with Mary nga ipahigayon sa alas 4:00 karong kaadlawon.
Matud ni Romana nga gipahigayon nila kagahapon ang ikaduhang walk-through o ang pagsubay sa mga rota sa Sinulog ug ilang gitan-aw kun duna pa bay angay nga palamboon sa ilang security measures nga gipatuman.
Sumala pa ni Romana nga nagpahigayon na usab siya og mga simulated exercises ug iya gyu’ng gitan-aw ang tanang aspeto sa seguridad atol sa Sinulog.
Nakigtagbo na usab si Romana sa Rector sa Basilica Menore del Sto. Niño alang sa seguridad sa manimbahay sa sulod sa pilgrim center.
Matud pa ni Romana nga iyang ipakatap ang 200 ka polis sa rota, wala pay labot sa mga volunteers.
Napanglantawan ni Romana nga mas modaghan pa ang mga motambong sa Sinulog ilabi na ang mga survivors sa sunod-sunod nga katalagman nga miigo sa Kabisay-an.
Gihangyo ni Romana ang katawhan nga motambong sa Sinulog nga dili magdala og gagmay’ng bata tungod kay lagmit kining mga bataa mawala gayud tungod sa kabaga sa duot unya sa katawhan.
Dugang pa ni Romana nga ang mga mahalon nga alahas hiposon lang una ug kun magdala og mga gadgets mas makaayo nga isulod kini sa body bags ug ibutang sa atubangan aron mabantayan gayud. (BANAT NEWS)