CEBU, Philippines - Nagpakitabang ang jail warden sa syudad sa Talisay kang Talisay City Mayor Johnny Delos Reyes aron may ikagasto sila sa pagtukod og isolation cell sa bilanggoan sa syudad. Kini human sa hostage drama sa sulod sa maong prisohan pinaagi sa usa ka langyaw nga piniriso nga mi-hostage sa kauban niya nga piniriso.
Sumala pa ni Jail Warden Insp. Gil Inopia sa Maghaway Detention and Rehabilitation Center nga angayan gyud nga tukoran og isolation cell ang maong prisohan aron malain ang mga piniriso nga tigpasiugda og kagubot.
Gipadayag ni Inopia ang iyang hangyo ngadto sa mayor ug sa mga opisyal sa syudad sa Talisay atol sa gipahigayon nga Peace and Order Council Meeting nga gipangulohan ni city councilor Danilo "Danny" Caballero.
Ang nahisgutang warden mipadangat usab sa iyang hangyo ngadto sa mayor pinaagi ni Konsehal Caballero aron kini makatabang sa panginahanglan sa prisohan sa dakbayan. (BANAT NEWS)