CEBU, Philippines - Gipasakaan na’g kasong robbery with homicide kagahapon ang usa ka security guard kinsa mikuha sa P80 mil nga kwarta sa bangko ug mipatay sa tulo ka tawo niadtong bisperas sa Bag-ong Tuig.
Si PO3 Alfredo Mandal, case investigator nagkanayon nga around 11:00 a.m. nila gi-file ang kaso batok kang Berly Tutud didto sa Regional Trial Court (RTC) sa Bogo City.
Si Judge Antonio Marigomen miisyu og commitment order nga nagmando sa kapolisan nga ipaslak si Tudtud sa Bureau of Jail Management and Penology sa Caputatan, Medellin.
Ang insidente nahitabo niadtong Disyembre 31, 2013 sa alas 11:55 sa gabii dihang gipamusil ni Tudtud ang kaubang gwardya nga si Dean Desierto, 26, nga taga Barangay Dakit, Bogo, ug kapuyo niini nga si Cecilia Torre, 30, ug ang accounting clerk nga si Jennelyn Migabon gamit ang iyang service shotgun.
Giangkon sa suspek ang krimen atubangan sa media ug ni Gov. Hilario Davide III atol sa pagpresentar kaniya human siya madakpi sa Sagay City upat ka adlaw human sa krimen.
Apan iyang giklaro nga P40,000 lang ug dili P80,000 ang iyang nakuha gikan sa vault.
Si Tudtud nadakpan sa mga miyembro sa Provincial Intelligence Branch (PIB) niadtong Domingo sa Barangay Tadlong, Sagay City, Negros Occidental. (BANAT NEWS)