CEBU, Philippines - Ang nasud sa Algeria midonar og 6,400 metric tons nga bugas alang sa mga nabiktima sa super typhoon Yolanda.
Ang ambassador sa People's Democratic Republic of Algeria, Ambassador Abdelmalek Bouhheddou, personal nga mitunol sa unang hugna sa bugas nga naabot kagahapong adlawa diha sa Cebu International Port.
Ang Algeria mitudlo sa Department of Social Welfare and Development 7 isip consignee sa maong donasyon.
Atol sa turnover, personal nga gidawat ni DSWD 7 Regional Director Mercedita Jabagat ang 780 metric tons nga bugas nga mobalor og $3 million.
Si Ambassador Bouhheddou mitunol sa donasyon pinasikad sa mando sa ilang presidente nga si President Abdelaziz Bouteflika.
Matud sa Algeria, ang bugas adto lamang gamiton sa nagpadayong relief and rehabilitation efforts alang sa mga naigo sa super typhoon Yolanda.
Kahinumduman nga ang dakong bahin sa Visayas gikuso-kuso sa labing kusog nga bagyo sa kasaysayan niadtong Nobiyembre 8, 2013. (BANAT NEWS)