CEBU, Philippines - Ang pag-ampo sa mga kalag sa mga biktima sa linog ug bagyong Yolanda ug ang pagpasalamat ngadto sa Ginoo maoy nahimong unod sa mensahe ni Cebu Archbishop Jose Palma sa iyang homiliya sa Santos nga Misa nga gihimo sa Cebu Metropolitan Cathedral sayo sa pagsugat sa tungang gabii sa Bag-ong Tuig 2014. Dugang pa niya nga kun balikon sa paglingi ang mga panghitabo sa miaging tuig, maisip kini nga “year of sadness and tears†tungod sa daghang mahal sa kinabuhi nga nakalas sa katalagman sa linog niadtong Oktubre 15 ug gisundan sa super Typhoon Yolanda niadtong Nobiyembre 8.
Kapin sa 6,000 ka kinabuhi ang nakalas sa bagyong Yolanda nga nagkinahanglan og pag-ampo nga mahingpit unta ang kalinaw sa ilang mga kalag sa kalit nilang pagtaliwan sa kalibutan, matud pang Palma. Apan matud pa ni Palma, maisip gihapon nga “year of celebration and cheers†ang 2013 bisan pa man sa mga bati nga panghitabo tungod kay duna man usab mga maayong gihatag ang Ginoo ngadto sa mga tawo.
Matud pa ni Palma, nga ang kinabuhi usa ka gasa, ug ang gihatag nga panalangin sa Ginoo angay lamang nga ipasalamat ug gipahinumdoman ang tanan nga ang kinabuhi hinulman lamang. Gidasig karon ni Palma ang katawhan nga sa pagsugat sa tuig 2014, kinahanglang palig-unon pa ang pag-ampo, pagsalig, pagpasalamat sa matag grasya nga madawat. -/EIM (BANAT NEWS)