CEBU, Philippines - Bana nga gibiyaan sa asawa nagbitay patay sa sulod sa ilang balay kansang liog gihiktan og pisi didto sa sitio Tabok, barangay Poblacion, dakbayan sa Danao alas 7:00 pasado ang takna kagahapon sa buntag.
Giila ni PO3 Arnold Labine ang namatay nga si Regie Degoma Villagantol, 34, minyo, walay trabaho ug nagpuyo sa maong dapit ug giingong gibiyaan sa iyang asawa.
Matud pa ni PO3 Labine nga giasoy ngadto kanila sa igsoong babaye sa naghikog, nga gibiyaan kini sa asawa sa wala masayri nga hinungdan sukad pa niadtong miaging semana sa wala pa ang Pasko.
Dugang pa ni PO3 Labine nga giasoy ngadto kanila sa igsoon sa namatay nga gikaguol kaayo niini ang paglakaw sa asawa nga wala hisayri asa kini karon.
Si PO3 Labine miingon gitabang pa unta sa igsoon ug mga silingan ang biktima pinaagi sa pagtangtang sa pisi sa liog ug gihatod ngadto sa Danao District Hospital apan gideklarar sa mga doktor sa maong tambalanan nga Dead on Arrival.
Nunot niini si PO3 Labine miingon nga bisan kun maoy pagtuo sa mga kabanay sa namatay nga walay foul play ang kamatayon niini, apan sa gihapon ilang gisugyot nga ipaubos sa autopsy aron masuta ang tinuod nga hinungdan sa kamatayon niini. (BANAT NEWS)