CEBU, Philippines - Gipalapdan pa sa Philippine Overseas Employment Administration (POEA) ang ilang serbisyo alang sa kaliboan ka bakasyonistang Overseas Filipino Workers (OFW) nga nanginahanglan og exit clearance.
Sumala sa PIA nga mipahibawo si POEA Administrator Hans Leo Cacdac, kalabot nga dili sila mohatag og exit clearance sa mga household service worker, ug mga undocumented worker nga walay existing record o wala sa POEA database, mga OFWs nga nag-usab og employer. Lakip usab kadtong mga OFW nga paingon sa mga restricted o gidili nga nasud, kadtong mga trabahante kansang mga employer naa usab sa watchlist.
Matud pa sa PIA nga ang POEA nagbutang og mga counter sa buhatan sa PAG-IBIG sa syudad sa Makati ug sa OWWA Central Office sa syudad sa Pasay, gawas pa sa Balik-Manggagawa offices sa Trinoma sa siyudad sa Quezon, Duty Free Parañaque ug sa SM Manila.
Nasayran usab nga gi-adjust usab sa POEA ang ilang office hours didto sa Central Office sa Ortigas aron maalagaran kadtong sayo sa buntag moadto sa ilang buhatan.
Sumala sa PIA nga sugod niadtong Huwebes, Disyembre 26 ug Enero 2, 3 ug 6, abli sa alas 6:00 sa buntag ang Balik-Manggagawa counter. Abli usab sila sa Enero 4 (Sabado) gikan alas 8:00 sa buntag hangtud alas 12:00 sa udto. Mahimo usab makuha sa mga OFWs ang ilang exit clearance o OEC sa mga POEA regional offices samtang naa pa sila sa ilang mga probinsiya.
Matud sa PIA nga ang taga Cebu mahimong mokuha sa ilang exit clearance sa POEA Cebu Regional Office nga anaa sa Gorordo Ave., dakbayan sa Sugbo. (BANAT NEWS)