CEBU, Philippines - Susihon sa Department of Labor and Employment (DOLE)7 ang report bahin sa giingong daghang mga bata ang gipatrabaho sa mga pabrika sa pabuto sa syudad sa Lapu-Lapu.
Si Emmanuel Ferrer, tigpamaba sa DOLE-7 mibutyag nga susihon sa ilang buhatan ang taho nga pabaligyaon usab og pabuto ang mga bata sa kamerkadohan sa maong dakyanan.
Midugang si Ferrer nga gipaabot usab nila nga may moreklamo batok niini aron labing molig-on ang ilang lakang batok sa child labor.
Gipasabot ni Ferrer nga base sa balaod sa pamuo gidid-an ang mga kabataan sa pagpamaligya og mga pabuto bisan pa og may kuyog nga ginikanan tungod kay nahimutang sa makuyaw ang ilang kinabuhi.
Miingon si Ferrer nga sa higayon nga makasakop ang ilang buhatan og mga bata nga gipatrabaho sa pabrika sa mga rebentador o kaha sa pagpamaligya og rebentador, dako ang posibilidad nga mapasakaan og kaso sa ilang buhatan ang mga ginikanan sa mga bata. (BANAT NEWS)