CEBU, Philippines - Nagsaulog usab sa Pasko ang mga binilanggo sa Mandaue City Jail uban ang ilang sakop sa pamilya niadtong Disyembre 25.
Si Chief Inspector Jessie Calumpang, ang jail warden miingon nga gitugotan nila ang mga pamilya, higala ug mga minahal sa kinabuhi sa maong mga piniriso sa pagbisita sa mga piniriso sa maong dakbayan gikan sa alas 8:00 sa buntag hangtud sa alas 5:00 sa hapon.
Si JO2 Manolito Villordon nga maoy jail guard on duty nga nahinabi sa Banat News miingon nga ang ilang pagtugot sa mga kabanay, asawa ug mga sakop sa pamilya ug mga higala nga makabisita, gihimo aron sa makausa pa magkahiusa sila sa maong adlaw sa pagsaulog sa Pasko.
Dugang pa niya nga gitugotan usab ang mga bisita nga makadala og pagkaon.
Hinuon una makalusot sa sulod sa prisohan ang maong mga pagkaon, higpit kini nga giinspection sa mga jail guard .
Kini aron sa pagsiguro nga luwas sa makuyaw nga mga butang sama sa gidili nga drugas ug uban pa.
Matud pa ni JO2 Villordon nga susama gihapong pagtugot ang ilang ihatag sa maong mga binilanggo sa umaabot nga Bag-ong Tuig unya sa Miyerkules sa sunod semana.
Gitataw niya nga ang kapin sa 700 ka mga binilanggo sagad nag-atubang sa mga kaso nga may labot sa pagpayuhot og illegal nga drugas, pagpatay ug uban pa. (BANAT NEWS)