CEBU, Philippines - Mipahuwam og P250 mil si Senador Alan Peter Cayetano ngadto sa Cebu City United Vendors Association (CCUVA), Inc. isip puhunan sa ilang pagpaninda.
Kini atol sa paglusad ni Cayetano sa iyang PTK (Presyo/Kita/Trabaho) Kontra 5/6 sa Sugbo kagahapon.
Ang kalihukan gitambongan nilang Cebu City Mayor Michael Rama ug ubang opisyal sama nilang Bokal Thadeo Ouano, Miguel Antonio Magpale, Celestino Martinez III, konsehal Emmarie “Lollipop†Ouano-Dizon sa dakbayan sa Mandaue ug Bise Mayor Guntrano Efren Gica sa Dumanjug, ang pangulo sa Vice Mayors League of the Philippines sa Sugbo.
Ang pangulo sa CCUVA nga si Maria Pino ang nidawat sa kwarta gikan kang Cayetano ug gisaksihan sa iyang kaubanang mga tinder sa Sugbo.
Dakung pasalamat ni Pino nga nakadawat sila sa maong hinabang isip pinaskohan gikan kang Cayetano.
Giklaro ni Cayetano bayaran sa mga tindera ang ilang mautang sa asosasyon ug mas ubos ang tubo kaysa mga tigpatanto nga langyaw.
Matag pamilya sa tindera makahuwam og P5 mil og bayaran kini matag adlaw sa tubo nga ubos sa 5 porsiyento.
Giawhag ni Cayetano ang CCUVA nga dili lisud-lisuron ang pagpahuwam sa kwarta samtang gihangyo usab ang mangutang nga mobayad sa husto.
Ang tubo dili kuhaon ni Cayetano apan moadto kini sa ilang asosasyon.
Sunod tuig mobalik si Cayetano aron pagsusi kung nilambo ba ang iyang gihatag nga puhunan ug iya kining dugangan kung kini nilambo.
Gawas sa maong kalihukan, si Cayetano nitambong usab sa kalihukan sa mga magtutudlo sa dakbayan sa Sugbo kagahapon. (BANAT NEWS)