CEBU, Philippines - Wala’y holiday ang ubang Field Offices ug personnel sa Department of Social Welfare and Development (DSWD) alang sa nagpadayon nilang pagpanghatag og relief goods sa mga nabiktima sa bagyong Yolanda. “Our staff will be on rotational duty so that relief distribution will not be interrupted,†matud pa ni DSWD Secretary Corazon Juliano-Soliman.
Busa miingon si Soliman nga samtang anaa sa ilang kaugalingong panimalay ang ubang mga kawani sa DSWD nga maglipay-lipay uban sa ilang mga minahal sa kinabuhi sa adlaw sa Pasko, ang madestino sa natad sa pagpang-apud-apod sa mga hinabang tua sila sa ilang destino. Gitug-an ni Soliman nga aron mapaspas ang pagpanghatag og relief goods, ang buhatan sa DSWD bag-ohay lang mibukas sa duha ka relief warehouse niini sa Isabel, Leyte ug Catbalogan, Samar alang sa storage ug repacking sa maong mga hinabang nga pagkaon.
Nagkanayon si Soliman nga ang DSWD anaa na karon sa ika-napulo na nga hugna sa pagpang-apud-apod og pinutos nga pagkaon ngadto sa 60 ka munisipalidad ug tulo ka syudad sa Eastern Visayas.
Sumala pa ni Soliman nga sugod sa Disyembre 16 ning tuiga, nakapanghatag na sila og mikabat sa 3,321,351 ka pinutos nga bugas ug ubang makaon, 494,213 litros nga tubig, 109,601 ka pakete sa canned goods ug 244,444 ka pakete sa high energy biscuits ngadto sa 273,782 ka pamilyang biktima sa bagyong Yolanda sa maong rehiyon.
Gibutyag ni Soliman nga nanghatag usab sila og non-food items sama sa tulda, hygiene kits, habol, mosquito nets, mats, towels, galamiton sa pagpangluto, container sa tubig, tsinelas ug plastic cups ug uban pa ngadto sa mga biktima sa katalagman. (BANAT NEWS)