CEBU, Philippines - Liog sa lalaki nga nagtan-aw og salida sa TV hapit maputol dihang gilaslas sa iyang silingan suspetsado duol sa Doña Pepang Cemetery, sitio Laray, barangay Careta sa dakbayan sa Sugbo.
Ang nalaslasan sa iyang liog apan buhi, mao si Johnjo Reyes Lagaras, 26, molupyo sa samang lugar.
Samtang ang suspetsado naila nga si Reynaldo Mangubat Oliveros, 39, silingan sa biktima.
Sumala sa kapolisan nga samtang nagtan-aw og salida sa TV ang biktima sa balay sa ig-agaw niini, kalit nga miabot ang suspetsado nga nagdala og kutsilyo.
Wala makabantay ang biktima busa nakuptan ang iyang ulo ug gilaslas ang liog niini mura’g manok.
Hinuon sa panlimbasog niya nga dili maputol ang iyang liog, miipsot ang biktima pinaagi sa huygo tudo nga pagdaro sa iyang ulo ngadto sa suwang sa suspetsado dayon mikabad og dagan ngadto sa karsada.
Gigukod siya sa suspetado apan natiyempohan usab nga didto sa maong lugar si PO3 Noe Rondina Base Police sa Police Regional Office 7 hinungdan nga giaresto niini ang suspetsado ug nagtingkagol na karon sa prisohan. agpasalamat ang biktima nga wala maputol ang iyang liog ug mibahad kini nga pasakaan og kaso ang suspetsado.
Gisuta pa sa kapolisan ang hinungdan sa maong pagpanglaslas. (BANAT NEWS)