CEBU, Philippines - Nagtingkagol sa Talisay City detention ang tulo ka mga giingong sugarol kinsa usa kanila ang naimbargohan og shabu atol sa gipahigayong operasyon sa mga polis batok sa ilegal nga sugal niadtong Biyernes sa gabii didto sa barangay Tabunok.
Ang mga nasikop mao sila si Reynan Cabigas, 45, taga barangay Tabunok, Mischelle Pabadora, taga barangay Camp 3, Talisay ug Jigger Labitad, 35, taga Tabunok.
Si Inspector Rogene Fodutan uban nila ni SPO1 Edgar Causon, SPO1 Benjamin Sabellita, SPO1 Isaias Cabuenas, PO3 Rey Bucao, PO3 Benedicto Lasque ug PO2 Esmer Gahi ang misikop sa mga suspetsado.
Ang mga suspetsado giingong naabtan sa nahisgutang mga polis nga nagduwa og tong-its sa nahisgutang lugar.
Naimbargo sa mga polis gikan sa mga suspetsado ang baraha ug pusta nga kwarta nga nagkantidad og P60.
Apan gawas sa baraha ug kwarta, ang nahisgutang mga polis giingong naka-recover og tulo ka silver nga paketeng shabu nga gisulod sa bayanan sa posporo gikan sa posisyon ni Labitad.
Si Causon mibutyag kagahapon sa Banat News nga si Cabigas ug Pabadora mag-atubang og kasong kalapasan sa Presidential Decree 1602 kon “Illegal Gambling Lawâ€.
Samtang si Labitad gawas sa illegal gambling mag-atubang usab og kasong paghupot og ginadiling drugas. (BANAT NEWS)