CEBU, Philippines - Giwarningan sa kapolisan ang publiko nga doblehon ang pagbantay niini gikan sa mga kawatan ilabi na sa “Laglag Bariya Gang†(LBG)
Ang maong pasidaan gihimo ni PSr. Insp. Sorgaol Quijano sa Theft and Robbery Section sa Cebu City Police Office tungod sa nahitabo sa usa ka pasahero sa jeep nga nabiktima sa LBG sa miaging adlaw.
Mikabat sa P10,000 ang nasakiyo sa tulo ka wala hiilhing miyembro sa LBG gikan kang Maria Christina Tan, 35, molupyo sa St. James, La Guardia, sa barangay Apas, kinsa pasahero sa 17C nga jeep sa rota nga Ramos-Lahug.
Ang biktima miasoy sa kapolisan nga sa wala pa siya mosakay sa jeep, miadto pa siya sa Velez General Hospital kay nagpa-check-up.
Human siya ma-check-up mipara siya og jeep ug didto siya molingkod taliwa sa duha ka lalaki.
Unya namatikdan niya, base sa giasoy niya sa kapolisan nga mihagbong og P.25 ang tupad niyang lalaki dayon giingnan siya nga “Miss, nahulog imung sinsiyo ohâ€.
Tungod kay dili man iyaha, iyang gipasagdan ang maong sensiyo ug nanaug siya sa jeep.
Paghiling niya sa iyang bag sulod sa usa ka kan-anan sa General Maxilom Avenue, wala na ang iyang kwarta. Iya dayon kining gisumbong sa Theft and Robbery Section sa Cebu City Police Office.
Si PSr. Insp/ Quijano miingon nga migrabi na ang kalihokan sa LBG karon busa angay doblehon sa publiko ang pagbantay niini. (BANAT NEWS)