CEBU, Philippines - Gisuspenso kagahapon ang prangkisa sa Vallacar Transit Inc. ang tag-iya sa nalimbuwad nga Ceres Bus sa lungsod sa Badian sa Land Transportation Franchising and Regulatory Board 7 kagahapong adlawa.
Ang Regional Director sa LTFRB 7 Ahmed Cuizon nga nahinabi sa Banat News miingon nga iya nang gipakanaog ang suspension order kagahapon sa hapon.
“Naa na tay gipreparar nga suspension order ug ato ning ipakanaog karong adlawa (kagahapon), ipadawat nato sa Vallacar Transit,†sumala pa ni Cuizon.
Sumala pa ni Cuizon nga apektado ang tanang mga bus nga ubos sa maong franchise sugod kagahapong adlawa ug molungtad kini sulod sa usa ka bulan.
“Ang pagsuspenso sa mga napu ka bus belonging to the same franchise number niining bus nga naaksidente sa Badian, karong adlawa magsugod. Ug sugod karon 30 diyas pa usa ilibkas,†dugang ni Cuizon.
Malibkas lang ang maong suspension order kung mabuhat na sa tag-iya ang mga rekisitos nga angay’ng buhaton.
Sumala pa ni Cuizon nga matud pa sa lagda sa LTFRB nga kun dunay mamatay sa operasyon sa usa ka bus ang tanan nga bus ubos sa parehong franchise ipailawom sa road worthiness test.
“Ang atoang mga driver sa napulo ka units, kinahanglan ipa-undergo og safety seminar sa LTO unya ipa-ilawom pud og drug test ug alcohol test unya,†dugang ni Cuizon. Miingon si Cuizon nga iya nang personal nga gitawgan ang Vallacar Transit ug mibulontaryo kini sa pagpagarahe sa ilang mga bus. (BANAT NEWS)