CEBU, Philippines - Naluwas ang usa ka 30-anyos nga lalaki nga gituohang adunay deperensya sa pangisip nga milayat sa Marcelo Fernan Bridge sa habig nga bahin sa barangay Pusok, dakbayan sa Lapu-Lapu ala 1:30 ang takna sa hapon niadtong miaging Domingo. Si PO1 Wilson Gonzaga sa Presinto 5 sa Lapu-Lapu City Police Office (LLCPO) miila sa milayat nga mao si Josep Tunacao Casinillo, taga barangay Bankal sa maong dakbayan.
Matud pa ni Gonzaga nga nakit-an sa CCTV camera operator si Casinillo nga mikatkat sa ibabaw nga bahin sa maong taytayan hinungdan nga mitawag kini dayon sa kapolisan.
Ang Maritime Police dali usab nga miresponde ug nagpaabot sa ubos ilawom sa maong taytayan aron matabangan dayon si Casinillo kun molayat kini.
Matud pa nga wala gyud mopatuo si Casinillo bisan giunsa pa sa pagkombinsir nga pakanaogon kay midayon gyud kini sa paglayat sa gibanabanang 50 ka metros padung sa ubos.
Maayo na lang nga nag-atang nang daan ang mga sakop sa Maritime Police sa ubos ug daling mihaw-as kang Casinillo nga wala nay panimuot gikan sa tubig ug gidala kini sa nagpaabot nga mga sakop sa Emergency Rescue Unit Foundation (ERUF).
Si Casinillio gihatod sa Vicente Sotto Memorial Medical Center sa dakbayan sa Sugbo ug luwas na ang kahimtang apan nakaangkon gyud kini og daghang bun-og tungod sa impact pagtugpa niya sa tubig.
Matud ni Gonzaga nga ang kabanay ni Casinillo mibutyag nga nakasab-an diay kini sa ilaha. Sa milabay’ng semana, usa ka babaye ang naluwas usab sa ERUF diha sa Mactan-Mandaue Bridge nga misuway usab og layat. (BANAT NEWS)