CEBU, Philippines - Gibutyag ni Lapu-Lapu City Police Office Director Sr. Supt. Rey Lyndon Lawas nga 270 sa 293 sa iyang mga pulis nakadawat na sa bag-ong armas nga bag-ong gi-issue ngadto kanila.
Samtang ang 23 ka armas niini wala pa mahatag ngadto sa mga pulis human masuta nga bagsak sa proffeciency test ang maong mga pulis.
Ang maong mga armas kabahin kini sa bag-ohay lang napalit sa PNP nga 74,879 firearms karong tuiga nga maoy gisaad kaniadto ni Presidente Benigno Aquino III sa kapolisan.
Ang PRO-7 makadawat og 1,310 ka mga Glock 17 pistols nga maoy ipangapud-apod sa nagkadaiyang police units sa rehiyon . Sagad sa mga isyuhan niini mao ang mga nagranggo gikan sa Police Officers 1 hangtud sa Police Officer 3.
Si Lawas mipahimangno sa iyang mga pulis kun unsa ka importante nga hanas sa maong armas ang iyang mga sakop.
Samtang karong umaabot sunod semana sugdan na ni Lawas ang pagbutang og tabon sa mga sumbohan sa mga armas sa kapolisan aron dili nila kini magamit sa pagpabuto niini atol sa Pasko ug Bag-ong Tuig.
Matud pa ni Lawas dako siya og pagsalig sa iyang mga sakop nga dili magpabuto apan mas maayo kung tabunan ang sumbohan sa ilang mga armas aron dili kini makapanghimakak sa panahon nga magpabuto kini kay selyado ug pirmado ang tape nga gamiton pagtak-op sa mga sumbuhan sa armas.
Mipasidaan si Lawas nga bug-at nga kasong atubangon sa mga polis nga masakpang magpabuto atol sa kapaskuhan.(/EIM)(BANAT NEWS)