CEBU, Philippines - Gusto ni Mayor Michael Rama nga ang ubang mga karsada dinhi sa dakbayan sa Sugbo ipadeklarar nga “national roads†aron nga ang Department of Public Works and Highways (DPWH) mao na ang moatiman niini.
Apil sa mga karsada nga gitumbok ni Rama nga madeklarar nga national road mao ang gitawag og “Highway Tagunol†– ang karsada nga nagsukad sa Barangay Mambaling lahos na ngadto sa Barangay Inayawan.
Gipasabot sa mayor nga ang “Highway Tagunol†gigamit nga karsada alang sa mga sakyanan nga mopaingon sa dakbayan sa Talisay mao nga dili ra kay mga sakyanan dinhi sa dakbayan sa Sugbo ang moagi niini.
Apan dunay problema alang sa katumanan sa gitinguha ni Mayor Rama tungod kay ang “Highway Tagunol†nga ang tinuoray’ng ngalan mao ang Rizal Avenue Extension wala makaabot og napulo ka metros ang gilapdon.
Ang lagda mao nga kadto ra nga mga karsada nga ang gilapdon kapin sa napulo ka metros maoy mahimong madeklarar nga national roads. Matud ni Rama nga kun ang mga karsada mahimo na nga national roads dili na kaayo makagasto ang dakbayan alang sa pag-atiman sa maong mga karsada. Si Rama mipasabot nga ang kwarta sa dakbayan sa Sugbo nga gamiton unta sa pag-atiman sa karsada mahimo na nga gastohon alang sa laing mga proyekto nga kapahimuslan sa katawhan. (BANAT NEWS)