CEBU, Philippines - Andam nga mohatag og napulo ka libo ka pumpboat ang kagamhanan alang sa 20 mil ka mga mananagat sa tulo ka rehiyon sa nasud nga naapektohan sa bagyong Yolanda niadtong Nobiyembre 8, 2013. Kini ang gipahayag ni Assistant Regional Director Allan Poquita sa Bureau of Fisheries and Acquatic Resources (BFAR)7 sa interview sa Banat News.
Matud pa ni Poquita nga ila kining gihimo aron ang matag duha ka managsilingan nga mananagat makabaton og tag-usa ka pumpboat .
Miingon si Poquita nga ila na nga gihatag ang 200 ka makina sa pumpboat sa amihanang bahin sa Sugbo, diin 51 niini ang alang sa mga mananagat nga biktima sa bagyo sa lungsod sa Bantayan sa isla sa Bantayan.
Midugang si Poquita nga kining mga pumpboat dili hatag nga libre kundili pabayran usab kini og hinayhinay sa mga hingtungdan.
Wala pa itakda sa BFAR kun kanus-a magsugod ang pagpamayad niini apan gipaniguro nila nga mga buwan sa Enero ikapang-apud-apod na kini ngadto sa mga mananagat.
Samtang ang benepisyaryo nga mananagat ilhon pinaagi sa mga opisyal sa lokal nga kagamhanan. (/WC)(BANAT NEWS)