CEBU, Philippines - Giawhag sa gobernador sa lalawigan sa Sugbo ang mga power sector dinhi sa Sugbo nga dili lang una mopatuman og usbaw sa singil sa kuryente.
Gihimo kini ni Gov. Hilario Davide III atol sa panagtigom sa power sector sa usa ka meeting sa usa sa mga hotel sa dakbayan kagahapon sa buntag.
Sumala pa sa gobernador nga nag-ilaid pa karon ang katawhan tungod sa duha ka nagsunod nga mga katalagman.
Gikwestyon usab ni Davide ang power sector kung kanus-a pa mabalik sa normal ang supply sa kuryente tungod sa nagkagrabeng rotational brownout.
Ang Visayan Electric Company mipasabot nga napugos sila sa pagpatuman og rotational brown outs sanglit kuwang gyud ang suplay sa kuryente karon tungod sa nangagubang pasilidad sa mga power producers.
Ang VECO nagsuplay lang karon og 640 ka megawatt sa franchise area niini nga nagkinahanglan og 725 ka megawatt . (BANAT NEWS)