CEBU, Philippines - Ang kabomberohan sa siyudad nagpahigayon og information drive campaign sa pag-edukar sa katawhan kabahin sa kadelikado sa paggamit og mga pabuto o firecrackers.
Ang hepe sa kabomberohan sa siyudad nga si Chief Inspector Randy Mendaros nagkanayon nga niining nagkaduol na ang Pasko ug Bag-ong Tuig padayon usab ang ilang information drive campaign aron ang katawhan ma-edukar kini sa ka peligro sa mga pabuto.
Gawas nga makaputol kini sa tudlo makadaot usab sa panglawas ang aso niini.
Matud ni Mendaros nga gi-discourage nila ang katawhan sa paggamit og mga pabuto sa pagsugat sa kapaskohan.
Sa laing bahin, sama sa milabay’ng mga tuig diha duol sa covered court sa barangay Lagtang ang gitumbok nga lugar diin adto makapamaligya og mga pabuto paglikay sa disgrasya.
Matud ni Mendaros nga mangayo sila og tabang sa kapolisan sa pag-monitor sa mga naninda og mga dagkong pabuto aron kini kompiskahon.
Ang mga maninda og pabuto nga wala sa designated area embargohon usab ang mga pabuto niining baligya. (BANAT NEWS)