CEBU, Philippines - Kinahanglang manaug sa ilang katungdanan ang 20 ka kongresista ug kapin sa 400 ka mga lokal nga opisyal nga naglakip sa mga opisyal dinhi sa Cebu tungod sa kapakyas sa pag-file sa Statement of Contribution and Expenditure kon SOCE.
Si Commission on Election (Comelec) Chairman Sixto Brillantes miingon nga duna na sila’y kasabotan sa Department of Interior and Local Government (DILG) nga di palingkuron ang mga elected officials kung di makompleto ang ilang rekisito sama sa ilang SOCE ngadto sa Comelec.
Ang matangtang sa ilang katungdanan mao ang 20 ka kongresista, upat ka gobernador, usa ka vice governor, 26 ka mayor, 35 vice mayor ug 278 ka mga konsehal, 11 ka board members ug 48 city board members (konsehal).
Onse ka konsehal sa Cebu ang apil sa gimandoan sa pagkanaog sa pwesto, pito niini sa Danao City nga sila si Konsehal Ivy Durano-Meca ; Jed Almendras; John Cane; Cynthia Duterte; Jove Enriquez; Celso Meca ug Jojo Roble.
Apan matud ni Comelec Provincial election supervisor Marco Lionel Castillano , si Atty. Ian Dominic Marigomen ang election officer sa Danao mikompirmar nga naka-file gyud ang pito sa ilang SOCE.
Gawas sa Danao City, sila si Mandaue City Councilors Editha Cabahug ug Tony Dabon gimandoan usab sa pagkanaog tungod gihapon sa maong rason, apan si Mandaue City election officer Atty. Anna Fleur Gujilde mibutyag nga pulos nakasumitir sa ilang SOCE ang duha.
“Our records show that councilor Dabon and Cabahug filed their SOCE on time. Their docs were submitted along with the docs of other winning candidates. We’ll just inform Comelec Head Office regarding this.â€
Mao gihapon kini ang gitug-an ni Sta. Fe Election Officer Neriza Gigante bahin sa SOCE ni Councilor Louwela Pacila nga nasumitir na niini niadto pang Hunyo 10, 2013. Samtang gisuwayan sa Banat News pagkuha ang habig sa election officer sa Tabogon bahin sa SOCE ni Councilor Rodrigo Sinoy kinsa naapil sa maong kamandoan. (BANAT NEWS)