CEBU, Philippines - Mitumaw karon ang kalibog tali sa mga drayber ug sa mga tigpatuman sa mga lagda sa trapiko ilabi na dinhi sa Cebu City Traffic Office Management kabahin sa kung unsa gyu’y lehitimong kolor sa Persons with Disabilities (PWD) stickers nga ibutang sa atubangan sa ilang mga sakyanan.
Kini gumikan kay giingong dunay mga nanggawas nga mga pekeng PWD nga mao karo’y sagad nga gipamilit sa mga jeep pasaheroan, mga taksi ug buses.
Apan ang pangu sa Cebu City Federation of Persons with Disabilities (PWD) Danny Omayan miklaro nga blue color ang lehitimo ug standard nga PWD sticker nga nakalatid ubos sa Republic Act 10070.
Kini human nakompirma ni Omayan ug Joy Tumulak, operations officer sa City Traffic Operations Management (CITOM) nga adunay bogus PWD stickers color pula ang gibaligya ngadto sa mga drayber sa usa ra usab ka sakop sa PWD diha sa dalan Carlock syudad sa Sugbo.
Si Tumulak sa pakighinabi sa Banat Manobela mitug-an nga nakompirmar gyud niya nga bogus o peke ang maong gipamaligyang sticker sa maong PWD.
"Gi-adto gyud nako last week and confirmed gyud (namaligya og fake PWD stickers)," matud ni Tumalak.
Samtang si Omayan nagkanayon nga sa niaging tuig pa nila gi-warningan ang maong tawo nga hunongon na ang pagpamaligya niini og bogus nga sticker.
"Gihimo man ‘nuon lagi nga panginabuhian. Maluoy man pud lagi ta kay PWD pud baya ning namaligya," matud ni Omayan.
Gumikan niini si Omayan mipahimangno sa mga drayber sa Metro Cebu nga sa Cebu City Treasurer’s Office lamang mopalit sa maong stickers nga nagkantidad lang og P100.
Human makabayad sa CTO, ma-claim ang maong sticker sa Persons with Disability Affairs Office, sa ground floor sa legislative building pinaagi sa pag-presentar sa official receipt kon OR gikan sa CTO pagmatuod nga nakabayad na sila niini.
Ang PWD blue sticker adunay upat ka logo sa Cebu City Hall, Land Transportation Office , Land Transportation Franchising and Regulatory Board, ug PWD, matud ni Omayan,
Midugang si Omayan nga dako gyud nga kalapasan ang gibuhat sa maong PWD nga namaligya sa maong peke nga PWD stickers.
"Atong himuon ang atong kaya aron maundang ni siya, apan hatagan pud nato og chance kay kapit sa patalim ra man ni siya," dugang niya.
Apan pipila ka mga drayber nga gikahinabi sa Banat Manobela ang nasagmuyo tungod kay nailad sa maong mamaligyaay og pula nga PWD stickers nga ilang napalit sa presyo nga P295.
Buot nila karon nga ipadakop ang maong PWD gumikan sa kahasol nga gihatag niini kanila ug sa ilang panginabuhian tungod kay nagtuo sila nga legitimate ang maong mga sticker kay lagi PWD usab kini.
Mihangyo usab sila sa CITOM nga unta dili sila isyuhan og citation tickets o ba kaha temporary operators permit (TOP) tungod kay biktima man sila ug ilaha usab kining gibayran sa tinarong nga paagi sa pagtuong mao gyud kadto ang lehitimong tighimo sa maong PWD stickers.
Si Tumulak midugang nga naghuwat lamang sila sa direktiba sa Department of Social Welfare and Services alang sa ilang legal nga lakang batok sa maong nanghimo ug namaligya og peke nga PWD stickers.
Si DSWS head Dr. Ester Concha sa iyang bahin miingon nga nangita sila karon og specific nga ordinansa ug ebidensya aron masuportahan ang ilang legal nga lakang batok sa manghimoay og bogus PWD stickers.
Matud ni Tumulak nga samtang naghulat ang CITOM sa order sa DSWS, ila usab i-implementar ang estrikto nga pagpanakop sa mga pasaheroan nga way PWD stickers.
Kahinumduman nga mikabat na og dul-an 400 ka pasaheroan o 197 Public Utility Vehicle (PUV), 164 taxi ug duha ka buses ang nakalapas sa Commemorative Act 146 kun Batas Pambansa 344.
Nakalatid sa Batas Pambansa (BP) 344 kun national accessibility law sa mga PWD nga ang tanang sakyanan de-pasaheroan, building, airport, barko, airplane ug uban pa gi-require gyud sa pagbutang og PWD sticker. (BANAT NEWS)