CEBU, Philippines - Nadakpan ang usa sa mga suspetsado sa pagpanulis sa Minute Burger Stall sa National High Way barangay Ward 4, lungsod sa Minglanilla lalawigan sa Sugbo alas 9:00 sa gabii sa miaging adlaw.
Ang nadakpan mao si Antonio Flores Carubio Jr. alyas “Junrixâ€, 21, lumad taga Dalaguete lalawigan sa Sugbo apan temporaryong nagpuyo sa dakbayan sa Naga.
Ang maong suspetsado maoy gitudlo nga maoy mitulis sa Minute Burger Stall niadtong Disyembre 6, ala 1:00 sa kadlawon.
Sa follow-up nga imbestigasyon sa kapolisan nga gihimo nila ni SPO3 Proculo Ando Jr., SPO1 Rolando Bastida, SPO1 Roland Camello ug PO1 Edsel Recablanca, adunay nagpahibaw sa kapolisan nga mag-estambayan sa usa ka bakeshop sa National High Way, sa Tungkop, lungsod sa Minganilla ang suspek.
Tungod niini, gilusad ang operasyon batok sa suspek ug gikuyogan sa mga trabahante sa maong burgeran nga sila si Eric Callora Fabillar ug si Naome Hinampas Hoyle ang kapolisan pag-ila kang Carubio. Dihang positibo kining gitumbok sa mga biktima dali kining gisikop ug diha nakuhaan kini og usa ka Super .38 nga pistola ug magazine nga adunay unom ka bala.
Si PO3 Ranje Lopez sa Minglanilla Police Station nahinabi sa Banat News, miingon nga wala pa sila’y lead sa kauban sa suspek.
Sumala pa ni Lopez nga gipasaka na usab ang kaso batok sa suspetsado nga Robbery ug Illegal Possession of Firearms.
Padayon gihapon ang imbestigasyon sa kapolisan sa maong insidente. (BANAT NEWS)