CEBU, Philippines - Dul-an sa P160,000 nga kantidad sa isda nga positibong nakuha pinaagi sa illegal fishing ang gisakmit sa mga sakop sa Provincial Environment & Natural Resources Office kon PENRO ug Anti-Illegal Fishing Task Force diha sa Don Pedro, Bogo niadtong Disyembre 7,2013. Matud ni Loy Anthony Madrigal, pangulo sa Chief and Security Office sa probinsiya, duha ka managlahing sakyanan ang nasakmit sa maong operasyon sulod sa usa ka adlaw.Alas sais kinse sa buntag, unang nasakmit sa awtoridad ang trayntay kuwatro nga kahon sa isdang Buraw ug Kapisnun nga giingong gipanag-iya nila ni Milanel Pilones ug Arnold Yase nga parehong taga Poblacion, Daanbantayan.
Paglabay sa duha ka oras, aduna’y laing siyam ka kahon nga ang sulod mga Bolinao ang nasakmit nga gituohang pipanag-iya nilang Sonia Godinez ug Juanita Tomabili nga parehong taga Mahawak, Medellin.Giagi ang mga nasakmit nga isda sa fish inspector sa San Remigio ug migawas nga positibong nakuha kini sa illegal nga paagi sa pagpanagat. Apan, matod ni Madrigal, gihimakak nilang Pilones ug Yase nga sila mismo ang migamit sa dinamita sa ilang pagpanagat.
Dugang nila nga nakadungan sila og mga mananagat nga naggamit og dinamita apan ang nabingwit nila nga mga isda nangamatay tungod sa dinamita.“Balaod man ni, ug kinahanglan natong embargohon (ang isda) kay ni-positive man siya, regardless kun unsay tinuod (sila ba o dili ang nigamit sa dinamita), kun unsay ebidensya, mao gyud na,†asoy ni Madrigal.Miangkon silang Godinez ug Tomabili nga gigamitan og dinamita ang mga isdang nasakmit gikan kanila. Ang mga nasakmit nga isda giingong dad-on unta sa Pasil Fish Market aron didto ibaligya.Ang dinakpan nga sakyanan nga parehong Isuzu Elf gi-embargo tungod sa kalapasan sa Provincial Ordinance No. 2008-10.
Ang mga nadakpan nga tag-iya wala gitanggong sa prisohan apan gipapirma lang sila nga mopakita sa Kapitolyo aron mahusay ang maong kaso.Sa laing bahin, matod ni Madrigal, gi-turn-over na sa lokal nga Department of Social Welfare and Development (DSWD) sa San Remigio ang mga nasakmit nga isda ug gipangapod-apod na kini sa mga barangay nga naapektuhan sa bagyong Yolanda.
Mitug-an sab si Madrigal nga bisan og aduna na siya’y death threats nga nadawat sa maong lugar tungod sa pagpanakop, iya gihapon kining buhaton kay mao ni iyang trabaho. (BANAT NEWS)