CEBU, Philippines - Mikabat sa P300 mil ang danyos sa sunog nga miugdaw sa bodega sa Cosmopolitan Funeral Parlor (CFP) sa Nivel Hills, sa barangay Lahug, dakbayan sa Sugbo sa miaging Biyernes sa alas 11:00 pasado sa buntag.
Si SFO4 Joveto Abelgas sa Bureau of Fire Protection (BFP) sa maong dakbayan nahinabi sa mga tigbalita miingon nga ang kalayo didto magsugod sa luyo sa bodega.
Ang sulod sa bodega mao ang mga flammable materials sama sa thinner, pintal ug uban pa.
Ang maong mga butang maoy gamitonon para sa mga lungon nga gipabrika usab sa maong lugar.
Matud pa ni SFO4 Abelgas nga posibli nga ang hinungdan sa pag-ulbo sa kayo mao ang kalagmitang may nanigarilyo sulod sa bodega.
Gawas niini si SFO4 Abelgas nagduda usab nga may nag-charge og cellphone o appliances nga malagmit mi-overheat.
Gipaimbistigar usab ang duha ka mga empleyado kay sila ra may tawo didto dihang miulbo ang kayo.
Sumala pa ni Abelgas, nga wala’y nadunggan nga kayo sa linya sa kuryente o buto-buto sa wa pa magsugod ang sunog.
Hinuon wala namatay o naangol sa maong hitabo ug padayon pa nilang gisuta ang hinungdan sa sunog, matud pa ni Abelgas.
Gibana-bana nga mikabat sa P300,000 ang gibiling danyos sa maong sunog ug gipaubos kini sa 2nd alarm apan nakontrolar dayon sulod sa 10 minutos. (Marjorie A. Caballero USJR Intern/WC)(BANAT NEWS)