CEBU, Philippines - Patay ang usa ka batan-ong lalaki nga gituohang nagumon sa paggamit sa illegal nga drugas nga naghikog sa electrical wire nga gigaid sa iyang liog ug nagbitay sa sulod sa ilang balay sa sitio Seabreeze sa barangay Pusok, dakbayan sa Lapu-Lapu sa miaging kaadlawon.
Si PO2 Jomar Ybanez sa homicide section sa kapolisan sa maong dakbayan miila sa namatay nga si Warren Tejano, 24, ug ulitawo. Matud pa ni PO2 Ybañez nga niadto pa untang miaging bulan nilang nahukman nga isulod sa rehabilitation center sa dakbayan sa Sugbo si Tejano.
Apan matud sa inahan nga wala kini mahinayon tungod kay ang namatay mihangyo man nga dili magpasulod kay maningkamot kini nga molikay na sa paggamit sa illegal nga drugas. Si PO2 Ybanez miingon nga ilang gituohan nga wala gayod makalikay ang biktima sa paggamit sa illegal nga drugas hinungdan sa paghikog nga nakaingon sa iyang kamatayon. (/WC)(BANAT NEWS)