CEBU, Philippines - Nagplano ang kagamhanan sa dakbayan sa Sugbo sa pagtukod sa bag-ong Cebu City Memorial Medical Center sa South Reclamation Project luyo sa templete ni San Pedro Calungsod.
Matud ni Atty. Joey Daluz, executive assistant sa mayor sa Sugbo Michael Rama, nga nagkahinabi na sila sa plano ni Rama nga ipatukod ang CCMC sa SRP.
Ang tukoron nga hospital matud pa ni Daluz dunay 500 bed capacity ug mobalor kini og P252 milyones. Apan ipaagi ang pagtukod niini og pipila ka hugna tungod sa kadako sa kwarta nga kinahanglanon niini.
Sa una nga phase, magtukod una og 100 bed capacity nga building nga mobalor kini sa P1.5 milyon nga matud ni Daluz kaya ra kaayo sa dakbayan. Miingon si Daluz sa konseho nga gawas sa mga pribadong mga kompanya nga mipasalig sa pagtabang sa pagpatukod sa maong hospital ang DOH mipasalig sab sa paghatag og 500 milyones ka pesos ug gani ang DOH giingong makahatag na og pasiunang P100 milyones alang sa pagpatukod sa maong hospital.
Gipresentar kagahapong adlawa ni Daluz diha sa konseho ang plano sa mayor ug matud pa niini nga ila nang gi-umol ang budget sa pagtukod sa maong hospital.
Sumala pa ni Daluz nga mohatag ang City Engineering Office sa plano ug program of works sa maong proyekto ngadto sa konseho sa dakbayan aron ila kining masusi ug maaprobahan.
Dihang gipangutana si Daluz ni Konsehal Margot Osmeña kun marketable ba ang maong lokasyon miingon si Daluz nga dili problema kay naay Mambaling nga access road.
Ug kun masugdan na ang pagtukod sa maong hospital ang City Engineering Office mo-supervise lamang ug magkuha sila og kontraktor nga motukod sa maong building.
Matud ni Daluz nga ang karaang CCMC buot sa mayor nga ipa-demolish apan wala pay plano kun unsay buhaton sa maong luna. (Bryner Diaz ug Kristine Quintas sa The Freeman/EIM)(BANAT NEWS)