CEBU, Philippines - Nahimuot ang mga Bol-anon sa gipasalig ni Presidente Benigno Aquino III nga tukoran sila og maayong taytayan, bag-ong hospital, igong tinubdan sa suplay sa kuryente, bag-ong airport ug shelter assistance.
Sumala sa PIA Cebu nga gihimo sa pamuno nasud ang maong pasalig sa ikaduhang pagduaw niini ngadto sa Bohol ug didto gipadayag ang hingpit nga pagpabangon sa lalawigan nga gilusno sa 7.2 magnitude nga linog niadtong Oktubre 15, 2013.
Gipasalig usab sa presidente nga inigkahuman na sa bag-ong airport sa Panglao labi pang modugok ang mga turista sa maong lalawigan.
Sumala sa presidente nga ang maong airport mobukas og dugang oportunidad sa pangempleyo ug mopauswag sa panginabuhi sa taga Bohol. (Liezl Mabini Frasno/WC)
Nasaghiran sa van nga gimaneho’g hubog patay
Namatay ang usa ka 87 anyos nga babaye human dasmagi sa sakyanan nga gimaneho sa hubog nga driver didto sa barangay Pasol, lungsod sa Alcoy sa miaging hapon.
Ang biktima mao si Claudia Romanos, biyuda nga nagpuyo sa maong lugar samtang ang suspek nga driver nailhan usab nga si Heinz Rohr, 66, Swiss national, nga nagpuyo sa barangay Bonbon, Oslob.
Sa imbistigasyon nila ni PO2 Howard Maynopas, PO1 Joavie Tomarse ug PO1 Dwight Medrano, nasuta nga si Romanos nagbarug sa daplin sa karsada.
Apan milabang kini ug nataymingan nga milabay usab ang sakyanan nga Honda Van nga may plate no. KFD 992 nga gimaneho ni Rohr ug nadagit ang biktima.
Gihatud ni Rohr ang biktima ngadto sa Julio Cardinal Rosales Hospital apan gideklarar kining patay na.
Misurender dayon si Rohr sa kapolisan sa Alcoy Police Station ug nasuta nga hubog kini samtang nagmaneho sa sakyanan. (Marjorie Caballero USJR Intern/WC)
Giluba sa silingan angol
Angol ang usa ka lalaki human kini dunggaba samtang natulog sa sulod sa tindahan sa ukay-ukay sa sitio Ompad sa barangay Poblacion, dakbayan sa Lapulapu kagahapon sa alas 5:00 pasado sa buntag.
Ang biktima mao si Anjun Ascano, 21, minyo, nga nagpuyo sa maong dapit .
Ang suspek mao usab si Eduardo Canete, 32, silingan sa biktima. Si PO2 Jomar Ybanez sa homicide section sa kapolisan sa maong dakbayan mibutyag sa Banat News namat-an sa biktima nga gitaupan na sa kutsilyo ang iyang dughan.
Misuway siya og dagan apan gihansakan pa ang iyang buko-buko. Maayo kay may silingan nga nakabadlong midagan ang suspek samtang gidala sa tambalanan ang biktima. Matud pa ni PO2 Ybanez nga nadakpan nila ang suspetsado ug giandam na ang kiha batok niini nga nagkagulkol karon sa prisohan. (BANAT NEWS)