CEBU, Philippines - Patay na nga naabtan sa mga sakop sa kapolisan sa lungsod sa Balamban ang usa ka lalaki nga gipusil sa usa ka wala hiilhing kriminal didto sa sitio Sac-sac, barangay Arpili sa alas 6:30 sa miaging gabii.
Ang biktima naila nga si Rojelito Fuentes Bangguran, 29, may ka live-in partner ug residente sa maong lugar.
Base sa spot report sa Cebu City Police Office nasuta nga nakadungog ang mga silingan sa biktima og unom ka buto.
Dihang gisusi nila ang gigikanan sa mga buto ilang nakita nga nagbuy-od sa kilid sa karsada ang biktima nga wala nay kinabuhi ug may mga samad pinusilan sa iyang lawas.
Napunitan sa mga polis ang duha ka kabhang sa kalibre .45 nga pistola ug ang cell phone sa biktima.
Ang patay nga lawas sa biktima ipaubos sa kapolisan sa post mortem examination ug padayon pa sila sa pag-imbistigar sa maong hitabo. (BANAT NEWS)