CEBU, Philippines - Armas ug 13 ka paketeng shabu ang nasakmit sa kapolisan gikan sa tulo ka mga tawo sa anti-illegal drugs operation diha sa Purok Agbate sa barangay Looc, lungsod sa Liloan alas 10 pasado ang takna sa miaging gabii.
Ang nadakpan mao sila si Bryan Mahusay, 25; Joel Aliposo, 38; ug Alfredo Hamotosa, 38, pulos nagpuyo sa maong dapit.
Si PO3 Jesson Gayo sa kapolisan sa maong lungsod nga nahinabi sa Banat News miingon nga ilang nadawat ang ilegal nga kalihokan ni Mahusay sa maong lugar nga nakaaghat kang Chief Inspector Jose Leddawa nga maoy ilang hepe sa pagpangulo og buy bust operation sa maong dapit.
Matud pa ni Gayo nga dihang nahidangat ang team nga gipangulohan ni Chief Inspector Leddawa ilang naabtan nga usa ka Dionie Noval ang nagpalit unta og shabu kang Mahusay.
Dugang pa ni Gayo nga nakalingi sa iyang luyo si Noval ug nakamatikod kini sa nagpadulong nga mga polis hinungdan nga mibulhot kini og dagan pahilayo sa maong dapit ug wala na nila masikop.
Ang tulo nga nakalitan sa paghidangat sa mga polis wala na makalihok ug nadakpan. Nakuha ang usa ka kalibre 45 pistola nga may magazine ug mga bala gikan ni Aliposo samtang ang mga shabu nakuha kaniya ug sa duha ka mga kauban. (BANAT NEWS)