CEBU, Philippines - Ang Department of Trade and Industry-Cebu Province miluwat og 24 ka notice of violation sa mga retailer sa Bantayan Island human kini masakpi nga nag-overprice sa mga baligya nga sakop sa ilang gi-price freeze.
Matud pa ni DTI-Cebu Province director Nelia Navarro nga ang ilang price monitoring team naka monitor og 51 ka establisimento sa maong isla kaniadtong Novembre 21-22. Sa 51, 11 niini ang mga hardware nga tindahan og 40 ang mga retail store.
Matud pa ni Zaide Bati-on, ang chief of consumer welfare and business regulation sa DTI-Cebu Province, nga ilang nasuta nga taas og .50 ngadto P1 ang presyo sa mga baligya sa 24 ka mga retail store nga naa sulod ug sa gawas sa merkado sa lungsod sa Bantayan, Sta. Fe ug Madridejos.
"Immediately, we asked them to lower their prices. Although, we understand nga mahal sad daw ang ilang kuha," matud pa ni Bati-on.
Ang price monitoring team, nag-monitor lang sa presyo sa kape, processed milk, canned goods (sardinas) ug detergent bar. Dugang pa ni Bati-on nga ila usab nga gikuha ang presyo sa mga produkto sa hardware sa maong isla aron itandi sa presyo sa Cebu City.
Apan giklaro ni Bati-on nga ang mga produkto sa hardware, wala masakop sa ilang price freeze. (BANAT NEWS)