CEBU, Philippines - Namatay ang usa ka batang lalaki human makuryentihi sa nagyungyong nga street light nga mibad-ay sa service pool sulod sa Te-berns General Merchandise sa National Highway sa barangay Poblacion lungsod sa Dalaguete alas 8:30 sa buntag sa miaging adlaw.
Gideklara nga dead on arrival sa hospital si Christaniel Dwayne Pelare, 10, taga barangay Poblacion, lungsod sa Dalaguete.
Base sa pasiunang imbestigasyon sa kapolisan nga gipangunahan si PO3 Leocio Vanguardia ug PO3 Noeh Rosales, sa Dalaguete Police Station nasuta nga ang biktima padulong unta nga mopalit og school supplies sa maong tindahan.
Sa wala pa siya mosulod, nahimamat ug nakaestorya niya ang iyang higala ug samtang nagtabi sila aksidente niyang nagunitan ang nagyungyong nga live wire. Nalagpot ang bata pipila ka metros gikan sa iyang gibarugan ug dali siyang gibangon ni Marvin Reformado, security guard sa tindahan.
Gihatud dayon ang biktima sakay og traysikad ngadto sa Ildefonso Memorial Hospital apan gideklara kini nga dead on arrival sa doktor nga miatiman kaniya.
Sa imbistigasyon nga gipangunahan ni PO3 Nelson Saquibal, sa Dalaguete Police Station migawas nga sa wala pa ang maong hitabo nangayo na og tabang sa CEBECO si Shony Carubio, empleyado sa maong tindahan kaniadtong Nobiyembre 20, 2013. Kini tungod kay nagpunay na og piti-piti ug magsiga ang nagyungyong nga kuryente.
Apan gibalibaran lamang siya sa kawani sa CEBECO nga si Albino Simaringa ug miingon, “wala nay problema natural ra nang magpiti-piti ug magsigaâ€. Si PO3 Nelson Saquibal, nahinabi sa Banat News, miingon nga ang maong linya iya sa street light nga malagmit naputol.
Matud pa ni Saquibal, nga andam motabang ang CEBECO sa mga gasto sa pagpalubong sa bata. (BANAT NEWS)