CEBU, Philippines - Naigking na usab ang mga Sugboanon alas 2:15 ang takna kagahapon sa hapon sa kalit nga pagtay-og sa linog nga may gikusgong intensity 4 sa Bohol apan intensity 2 sa lalawigan sa Sugbu nga giingong aftershock gihapon sa 7.2 magnitude nga linog niadtong Oktubre 15 niining tuiga. Si Rolando Montañez sa Philippine Institute of Volcanology and Siesmology (Philvos) sa Mactan sa dakbayan sa Lapu-Lapu nga nahinabi sa Banat News miingon nga ang maong pagtay-og maoy ika 3,815 ka mga aftershock sa 7.2 magnitude nga linog. Matud pa ni Montanez nga ang subli nga pagtay-og kagahapon sa hapon maoy ika 110 ka mga pagtay-og nga nabatyagan sa katawhan nga dili na kaayo angay pa nga kabalak-an kay dili na man kini makamugna og kadaut sa mga kabtangan. Kahinumdoman nga dihang nahitabo ang 7.2 magnitude nga linog sa Central Visayas grabeng kadaut ang gibilin niini. (BANAT NEWS)