CEBU, Philippines - Tulo ka mga opisina ang gilungkab sa wala pa mailhing kawatan nga nakasakiyo og P1.2 milyon nga salapi sa ikaduhang andana sa Benley Building sa dalan J. de Veyra, North Reclamation Area, barangay Carreta sa dakbayan sa Sugbo.
Matud pa nga pasado alas 6:00 sa miaging buntag nadiskobrihan ang maong hitabo busa daling mipahigayon og ocular inspection ang mga sakop sa TRS uban sa Crime Scene Investigation.
Nasuta nga gilungkab ang tulo ka kwarto sa Benley Building nga nag-okupar sa Room Number 8, 9, ug 10.
Ang mga opisina nga gilungkab mao ang, Air You Go Travels, Legorio Law Office ug ang JJ&J Construction and Gen. Supply. Base sa ocular inspection nga gipahigayon sa Theft and Robbery Section (TRS) sa Cebu City Police Office (CCPO) nga ang mga suspetsado misulod sa building pinaagi sa pagkatkat sa terrace.
Matud pa nga ang mga suspetsado miabli sa pultahan sa mga opisina ug misakiyo sa mga cellphone, laptop lakip na sa salapi nga naa sa opisina.
Ang mga nakuha sa wala pa mailhing kawatan sa Air You Go Travels naglakip sa tulo ka mga cellphones ug P2 mil nga salapi. Samtang matud pa nga imbentaryuhon usa sa Legorio Law Office kung duna bay mga butang nga nawala sa maong opisina.
Samtang sa JJ&J Construction giguba sa mga kawatan ang vault niini ug gikuha ang P1.2 milyones nga salapi.
Padayon ang kapolisan sa pag-imbestigar sa maong hitabo aron sa pagtino kung kinsa ang mga responsable sa maong pagpanglungkab. (BANAT NEWS)