CEBU, Philippines - Gitugyan na sa Bureau of Customs ang onse ka 20 footer vans nga puno sa bugas ug usa ka container van nga ukay-ukay ngadto sa DSWD-7 alang sa mga biktima sa bagyong Yolanda sa probinsiya sa Leyte ug Cebu.
Si BOC Commisioner Rozzano Ruffino "Ruffy" Biazon, Brig. Gen. Roberto Almadin ang bag-ong Cebu Customs District Collector ug Coll. Paul Alcazaren maoy pormal nga mitugyan sa singko mil ka sakong bugas ug usa ka van sa ukay-ukay ngadto ni DSWD Regional Director Mercedita Jabagat.
Matud pa ni Biazon ang mga bugas gikan sa nasud sa Vietnam nga gisuwayan sa pagpalusot niadtong Abril 26, 2013 dinhi sa Sugbu nga nagkantidad og siyete milyones ka pesos.
Samtang ang tulo ka toneladang ukay-ukay gikan kini sa nasud sa Korea nga gipayuhot sa milabay’ng semana.
Si Jabagat sa iyang bahin mipasalig nga makaabot ngadto sa mga biktima sa bagyo ang maong mga hinabang gikan sa BOC ug ilaha kining bahinon dayon sa nagkadaiyang repacking centers sa DSWD sa dakbayan sa Sugbu, Mandaue ug Lapulapu aron madali kini og dala ngadto sa mga biktima sa kalamidad.
Samtang ipasusi usab ni Jabagat sa DOH kung maayo pa ba ang mga bugas gumikan kay dugay na kining naka-stock sa yarda sa Bureau of Customs.
Hinuon si Almaden sa iyang bahin mipakita ngadto sa media sa sample sa bugas nga ilang gi-donate nga wala’y angayan nga kabalak-an kay pwede pa kining makaon sa tawo.
Samtang giklaro ni Biazon ang isyu nga gikolektahan og buhis ang mga international aid.
"Under the law, wala talaga silang babayaran kasi donated relief goods yan from foreign donors. The bureau is not considering this an income," matud pa ni Biazon. (BANAT NEWS)